HEIMDAL

Kelda: www.vagaskip.dk

Heimdal er bygdur hjá Lias í Rættará í Havn í 1919. Og sum allir hinir motorbátarnir bygdir av Lias hevur Heimdal flata hekku, bygdur úr eik og furu. Í Heimdal verður ein Dan diesel við 10 hestakreftum settur í, eftir uppmálingar verður motorbáturin Heimdal skrásettur at vera 6,96 brutto registar tons.

Eftir rembingarnar í handilsvirkinnum hjá Hans Nikláa Niclasen síðst í 1920unum og fyrst í 1930unum, verður Heimdal partur av eini tvingsilsins sølu hjá handilsvirkinum. Tann 31. januar 1934 keypir P/F Balslev í Havn motorbátin Heimdal. Men longu árið eftir er motorbáturin seldur til Tvøroyar, so tað er møguligt at Heimdal ongantíð bleiv skrásettur við TN og Tórshavn sum heimstað.

Í 1935 keypa Clement Eliasen og Niels Mortensen á Tvøroyri, Heimdal, teir skifta 10 Hk Dan motorin út við ein Gamma Diesel 20/22 Hk. Samstundis veður motorbáturin uppmáldur av nýggjum og verður skrásettur at vera 8,75 brutto registar tons. Heimstaður er Tvøroyri við TG20.

Í 1961 verður Heimdal seldur norður á Toftir til Jóhan M. Olsen, Heimdal fær Toftir til heimstað og FD 611.

7 ár seinni í 1969, verður Heimdal aftur seldur til Suðuroyar, hesuferð til Oluf Ungagarð í Lopra. Heimdal fær TG40 og heimstað í Lopra.

Bara eitt ár seinni keypur Heri Mørkøre, -sum tá var komin til Tvøroyrar at vera apotekari-, motorbátin.

Heimdal heldur navnið, men fær nú aftur TG20 og Tvøroyri til heimstað. Heri Mørkøre gav bátinum eina høvuðsumvæling og setti nýggjan motor í, ein Volvo Penta við 125 hestakreftum. Nøkur ár seinni bleiv Heri Mørkøre settur landapotekari í Havn, hann tók Heimdal við til Havnar, men broytti ikki skrásetingina.

Í 2006 keypir Bjarni Heinesen úr Vestmanna, Heimdal. Nú verður Heimdal skrásettur við VN606 og heimstaði í Vestmanna. Heimdal er ofta at síggja til Regatta tiltakið runt Føroyar hetta tíðarskeiði.

Í 2016 seta miðvingar á stovn áhugafelag sum hevur til endamáls at keypa motorbátin Heimdal aftur til bygdina. Tann 15. august 2017 er keypið endaliga avgreitt og Áhugafelagið Heimdal í Miðvági eigur nú motorbátin Heimdal. Heimdal, sum upprunaliga varð bygdur til Miðvágs í 1919 og gongur sostatt á 98inda árið, fær nú upprunaliga havnakenningarnummarið aftur VA151, og heimstaður hjá Heimdal verður aftur Miðvágur eftir 83 ár í útlegd. 

Søgan hjá motorbátinum í stuttum:

Heimdal VA151

Bygdur 1919 hjá Lias í Rættará í Havn

Stødd: 6,96 BRT.

Motorur: Dan Diesel 10 Hk.

Skrásettur 1.oktober 1919.

1919 - Heimdal VA151, Miðvág - Hans Nicolaj Niclasen, Miðvág

1934 - Heimdal TN??, Tórshavn - P/F Balslev & Co, Tórshavn

1935 - Heimdal TG20, Tvøroyri - Clement Eliasen & Niels Mortensen, Tvøroyri

1961 - Heimdal FD611, Toftir - Johan.M.Olsen, Toftir

1969 - Heimdal TG40, Lopra - Oluf Ungagarð, Lopra

1970 - Heimdal TG20, Tvøroyri - Heri Mørkøre, Tvøroyri

2006 - Heimdal VN606, Vestmanna - Bjarni Heinesen, Vestmanna

2017 - Heimdal VA151, Miðvág - Áhugafelagið Heimdal, Miðvági

1935 - Uppmáldur av nýggjum til 8,75 Bruttotons

1935 - Nýggjan motor Gamma Diesel 20/22 Hk.

1970-1973 - Høvuðsumvældur

1973 - Nýggjan motor Volvo Penta 125 Hk.

Í dag er bara Heimdal eftir av teimum trimum motorbátunum, sum Hans Niklái Niclasen lat byggja í 1919 hjá Lias í Rættará. Hvar ið Hemarin og Royndin endaðu er enn ókent.