Skipasøga
Norðlýsið TN 24 er annar nýbygningurin av Tórshavnar Skipasmiðju. Tann fyrsti var Vón, sum Sigurð Simonsen í Fuglafirði bygdi. Kjølurin til Norðlýsið var strektur 20. apríl 1943, og 5. mai 1945 varð skipið latið Pf. Uvak í Havn.
Skipið varð brúkt sum línu-, snøris- og snelluskip. Men í mai mánaði 1948 treyt teimum agn. Við Jógvani Páll Fjallsbak sum skipara fór Norðlýsið tí norður um Føroyar við nøkrum fáum gørnum at royna eftir sild. Teir fingu nógva og góða sild, fóru út aftur við 40 gørnum og groyndu til ólavøku millum 40 og 90 fjórðingar í ein landnyrðing úr Fugloynni. Soleiðis byrjaði tann føroyska sildaveiðan, sum hevði so stóran týdning í fimti- og sekstiárunum.
31. januar 1953 seldi Pf. Uvak Norðlýsið. Keypari var Pf. Við Sjógv í Kollafirði, sm síðani seldi Carl August Jensen, keypmanni í Kollafirði, skipið.
Hann hevði Norðlýsið í trý ár og seldi tað so til Klaksvíkar. Keyparar vóru brøðurnir Jógvan og Jákup Heinesen, svágur teirra Julius Sørensen og pápabeiggi teirra, Fischer Heinesen. Teir áttu ein fjórðing hvør, og skrásetingarnummarið varð nú broytt til KG 386. Hesir fýra eigararnir stovnaðu 6. mars 1957 Pf. Ekliptika, sum yvirtók Norðlýsið.
Skipið var í Klaksvík í 9 ár. 4. mars í 1965 vórðu bæði partafelag og skip seld til Havnar. Jákup Johansen – Jákup hjá Carl á Lag – keypti Norðlýsið. Í nevndini sótu Jákup sjálvur, sonurin Páll og konan Elsa. Skrásetingarnummarið varð nú TN 24. Meðan Jákup hjá Carl á Lag átti Norðlýsið, varð tað í fleiri ár reitt út í Hvalba.
Pf. Ekliptika í Havn átti Norðlýsið, líka til Pf. Aurora Borealis í Havn keypti tað 25. juni 1984 og bygdi tað um til seglskip. Millum teir, sum tóku stig til hetta, vóru Tróndur Patursson, Tórmóður Dahl, Helgi Nyholm Debes, Birgir Enni, Kjartan Johansen, Thomas Arabo, Milson Zachariassen, Ivan Johansen, Óla Jákup Müller, Tryve Árting og Knút Nolsøe.
Millum skipararnar á Norðlýsinum kunnu nevnast Thorvald Andreassen í Havn, sum var tann fyrsti, ið førdi tað, Jógvan Páll Fjallsbak, Ingolvur Andreassen (bróðir Thorvald), Jógvan Heinesen í Klaksvík og Magnus Olsen. Seinastu mongu árini hevur Birgir Enni verið skipari.
Upprunalig nýtsla: Slupp, fiskifar
Ferðamannaloyvi: Ja, 50 ferðandi
Tilfar og tøkni: Skrokkur: Træ
Tøkni: Kravell
Yvirbygningur: Træ
Rigningur: Træ, stál
Træsløg: Bond, stevni og kjølur: Eik
Klæðing yvir vatnlinju: Eik
Klæðing undir vatnlinju: Eik
Dekk: Yangtek
Rundholt: Lerk
Framdráttarmegi: Segl, riggað sum skonnart
Skipasmiður / konstruktørur: Kjartan Mohr
Eldri eigarar UAK, Tórshavn: 1945 til 1957 (mett)
Ekliptika, Tórshavn: 1957 til 1986
Aurora Borealis, Tórshavn: 1986 til 1994
Nýtsla áður: Fiskiskapur
Siglingarøki: Føroyar
Broytingar:
1989: Ísetan av motori
2004: Skift motor (M.W.M, 199 KW/270 HK).
_ Tórshavn.png)
